My thoughts shared with you

28.ágúst 2019

Virðulegur forstöðumaður Tryggingastofnunar Ríkisins

Frú Sigríður Lillý Baldursdóttir

Ég heiti Hulda Björnsdóttir og kt.mín er 220545-7419

Ég sendi þér þetta opna bréf frú forstjóri, til þess að vekja athygli þína á erfiðleikum mínum og oft á tíðum skilningsleysi mínu varðandi starfshætti stofnunarinnar sem þú kæra frú stýrir nú.

Ég hóf að taka ellilífeyrir 67 ára og bjó þá og bý enn og hef búið allan tímann síðan í Portúgal.

Ég hef fengið frískattkort frá RSK á hverju ári þar sem tvísköttunarsamningar á milli Íslands og Portúgals gera ráð fyrir að ég greiði skatta í búsetulandi mínu þar sem ég var ekki opinber starfsmaður á Íslandi.

Á hverju ári, í desember, sendir RSK kort til Tryggingastofnunar ríkisins um að ekki skuli taka af mér skatta á Íslandi

Á hverju ári, í janúar hefur Tryggingastofnun ríkisins dregið af mér staðgreiðslu sem ég hef svo fengið endurgreidda í janúar eftir að hafa hringt til stofnunarinnar og ergt mig yfir gangi mála. Eina undantekningin er þetta ár, árið 2019, þar sem ég hóf að ergja mig við stofnunina í desember árið 2018 og var þá skráning fyrir útborgun í janúar 2019 leiðrétt og ekki dregin af staðgreiðsla á Íslandi. Þetta sýndi mér að það er hægt að leiðrétta ef vilji er fyrir hendi og var þetta gott mál og ég þakklát fyrir.

Nú bregður svo við að ég á nokkrar krónur inni hjá stofnuninni þegar endurreikningur er gerður fyrir árið 2018. Engin risaupphæð, og líklega nokkuð rétt reiknuð þegar ég skoða orlofs og desemberuppbætur.

Auðvitað ætti ég að vera þakklát fyrir að fá nokkrar krónur til baka en þar sem ég er að eðlisfari gefin fyrir að hlutirnir séu réttir þá reiddist ég þegar ég sá dregna staðgreiðslu af krónunum mínum.

Sendi ég nú e-mail til hinnar ágætu stofnunar sem þú stýrir og fékk þetta svar:

Staðgreiðsla var dreginn af endurgreiðslunni vegna uppgjörs 2018 vegna þess að ekki var skráð frískattkort í kerfi okkar fyrir árið 2018. Ef mistök voru gerð munt þú fá endurgreiðslu frá skattinum vegna ofgreiðslu á skatti. Sú endurgreiðsla kemur í ljós á vormánuðum 2020 þegar skattframtal 2019 er birt.

Einkennilegt svar finnst mér svo ekki sé meira sagt þar sem ég hef eftirfarandi e-mail frá RSK varðandi frískattkort fyrir árið 2018:

Tilvísun í mál: 20171203568

Ríkisskattstjóri hefur samþykkt umsókn þína um undanþágu frá greiðslu skatta af lífeyristekjum frá Tryggingastofnun ríkisins og lífeyrissjóði verslunarmanna og hefur tilkynning um það verið send þeim.
Undanþágan gildir fyrir tekjuárið 2018 og fellur úr gildi 31. desember 2018. Hún fellur einnig úr gildi ef þú flytur búferlum til Íslands og ber þér að tilkynna ríkisskattstjóra um flutning, ef það á við.
Tekjurnar eru skattskyldar í Portúgal og berð þú ábyrgð á skattskilum þar. Tekjurnar eru jafnframt framtalsskyldar hér á landi.

Eins og glöggt kemur fram í bréfi RSK var frískattkortið sent til Tryggingastofnunar og gildir fyrir árið 2018 og var samkvæmt því ekki dregin af mér staðgreiðsla á Íslandi árið 2018.

Þessi undanþága gildir fyrir árið 2018 og fellur úr gilidi þegar árið 2019 rennur upp og farið er að reikna skatta af tekjum fyrir árið 2019 . Fyrir árið 2019 er svo gefin út önnur tilskipun frá RSK.

Fyrir árið 2018 er enn í gildi kortið sem var gefið út fyrir árið 2018!

18.desember 2018 fæ ég eftirfarandi staðfestingu frá RSK um árið 2019

Tilvísun í mál: 20181202445

Ríkisskattstjóri hefur samþykkt beiðni þína um undanþágu frá greiðslu skatta af lífeyristekjum frá Tryggingastofnun ríkisins og lífeyrissjóði verslunarmanna og hefur tilkynning þar um verði send þeim.
Undanþágan gildir fyrir tekjuárið 2019. Hún fellur úr gildi ef þú flytur búferlum frá Portúgal og ber þér að tilkynna flutning til ríkisskattstjóra, ef það á við.
Tekjurnar eru skattskyldar í Portúgal og þú berð ábyrgð á skattskilum þar. Tekjurnar eru jafnframt framtalsskyldar hér á landi.

Eins og sést af framangreindum feitletruðum tilvitnunum eru uppslýsingar sendar í desember ár hvert til Tryggingastofnunar ríkisins og eru þær upplýsingar væntanlega skráðar inn í kerfið við kennitölu mína þar sem ég hef ekki verið rukkuð um staðgreiðslu á Íslandi hvorki fyrir árið 2018 eða 2019.

Þessu til staðfestingar set ég hér inn greiðsluáætlun frá TR til mín fyrir árið 2018 og 2019 þar sem fram kemur að ég greiði ekki staðgreiðslu skatta af greiðslum frá TR á Íslandi. Fyrst er áætlunin fyrir árið 2019 og svo fyrir árið 2018.

Skattana greiði ég í Portugal sem er búsetuland mitt og á milli landanna er í gildi tvísköttunarsamningur! Tvísköttunarsamningur kemur í veg fyrir að ég borgi tvöfalda skatta, ef það skildi vefjast fyrir einhverjum!

Greiðsluáætlun 2019

Nafn: Hulda Björnsdóttir Kennitala: Dagsetning áætlunar: 08.01.2019 Nr. greiðsluáætlunar: 5/2019

Prentað 29.01.2019 14:55

Laugavegi 114 105 Reykjavík Sími 560 4400 Veffang http://www.tr.is

Greiðslutegundir jan feb mar apr maí jún júl ágú sep okt nóv des Árið 2019

Skattskyldar greiðslutegundir            

Ellilífeyrir 188.445 jan 188.445 feb 188.445 mars 188.445 apríl 188.445 maí 188.445 júní 188.445 júlí 188.445 ágúst 188.445 sept 188.445 október 188.445 nóvember 188.445 desember 2.261.340 samtals

Orlofs- og desemberuppbót á ellilífeyri 0 0 0 0 0 0 24.694 0 0 0 0 37.042 61.736                                                                     Greiðslur alls 188.445 188.445 188.445 188.445 188.445 188.445 213.139 188.445 188.445 188.445 188.445 225.487 2.323.076

Útborgað 188.445 188.445 188.445 188.445 188.445 188.445 213.139 188.445 188.445 188.445 188.445 225.487 2.323.076

Ég nenni ekki að setja inn mánuðina en frú forstjóri þú hlýtur að átta þig á þessu.

Eins og sést að framan er ekki dreginn af skattur árið 2019 samkvæmt greiðsluáætlun þinnar ágætu stofnunar frú forstjóri!

Fyrir árið 2018 lítur þetta svona út afritað af mínum síðum á vef stofnunarinnar :

Greiðslutegundir jan feb mar apr maí jún júl ágú sep okt nóv des Árið 2018

Skattskyldar greiðslutegundir            

Ellilífeyrir 182.197 182.197 182.197 182.197 182.197 182.197 182.197 182.197 182.197 182.197 182.197 182.197 2.186.364 Orlofs- og desemberuppbót á ellilífeyri 0 0 0 0 0 0 23.900 0 0 0 0 35.851 59.751                                                                      Greiðslur alls 182.197 182.197 182.197 182.197 182.197 182.197 206.097 182.197 182.197 182.197 182.197 218.048 2.246.115

Frádráttur            

Innborgun á kröfur 108 0 0 0 0 0 0 0 0 0 0 0 108 Staðgreiðsla 0 0 0 0 0 0 0 0 0 0 0 0 0 Samtals 108 0 0 0 0 0 0 0 0 0 0 0 108             Útborgað 182.089 182.197 182.197 182.197 182.197 182.197 206.097 182.197 182.197 182.197 182.197 218.048 2.246.007

Eins og sést glöggt hér að framan þá er EKKI DREGINN AF SKATTUR árið 2018

Það hlýtur að þíða að frískattkort hafi verið skráð hjá stofnuninni, frú forstjóri árið 2018!

Launaseðill stofnunarinnar fyrir desember árið 2018 er svona:

Ellilífeyrir 01.12.2018-31.12.2018 182.197                              Samtals allt árið 2.186.364

Orlofs- og desemberuppbót á ellilífeyri 01.12.2018-31.12.2018 35.851       59.751

Samtals réttindi 218.048 2.246.115  

Frádráttur 0 (Enginn frádráttur, enginn staðgreiðsla dregin frá, hvers vegna? Jú, vegna þess að það var skráð frískattkort hjá hinni háæruverðugu stofnun árið 2018 rétt eins og öll hin árin á undan)

Frú forstóri,

Ég er orðin nokkuð þreytt á því að berjast við kerfi sem ætti að vera dauða einfalt, alla vega sýnist mér það og hef verið kerfisfræðingur í áratugi. Ég hef áhyggjur af því þegar heilsa mín brestur og ég get ekki staðið í stappi á hverju einasta ári við stofnun sem ætti að vera viðskiptavinavingjarnleg.

Ég er orðin áhyggjufull og ég er orðin reið.

Ég trúi því ekki að þú, frú forstjóri gefir fólki þínu fyrirmæli um að gera fólki eins og mér lífið erfitt með röngum upplýsingum og einkennilegum vinnubrögðum oft á tíðum. Ég bara trúi því ekki.

Ég hef nú verið í sambandi við stofnunina frá því að ég varð 67 ára. Stundum hefur skorist í odda og ég reiðst harkalega yfir viðbrögðum sem mér hafa fundist út í Hróa. Stundum, og oftar nú upp á síðkastið, eða undanfarin nokkur ár, hafa komið upp góðar stundir þar sem ég hef fengið góða þjónustu og uppýsingar, rétt eins og gerist hjá sómafyrirtækjum. Ég hef sagt frá því og þakkað fyrir á opinberum vettvangi. Mér finnst það sanngjarnt og hika ekki við að geta þess sem vel er gert.

Þar sem ég hrósa stofnuninni þegar ég fæ góða þjónustu áskil ég mér og nýti mér rétt til að verða reið og gagnrýna stofnunina þegar yfir mig gengur vitleysan og ruglið sem reynt er að troða upp á mig.

Ég er ekki ært gamalmenni.

Ég er klár kona á aldri sem er ekki hár þó ég sé hætt að vinna og komin á eftirlaun. Ég þekki vel til tölvumála og hvernig þær vinna og hvernig hægt er að láta þær vinna. Ég verð að treysta því að þú frú forstjóri hafir sæmilega kláru fólki á að skipa í tölvudeild svo stórs fyrirtækis og sé því ekki hvers vegna allir þessir ótrúlegu vankantar eru ekki sniðnir af kerfinu.

Ég verð að viðurkenna að ég hef áhyggjur af útreikningum vegna laga sem stofnunin braut og hún hefur verið dæmd fyrir og til stendur að leiðrétta 2 mánuði árið 2017 og endurgreiða fólki inneignir sem verða hærri en endurreikningur minn fyrir árið 2018. Þarf ég að staglast í stofnunni þegar endurreikningur vegna tapaða máls stofnunarinnar kemur? Þarf ég þá að ganga enn í gegnum sama ferlið og láta segja mér að ekki sé skráð frískattkort hjá stofnuninni fyrir árið 2017? Gæti það hugsast?

Ég harma það að hafa nú tekið til bragðs að rita opinbert bréf til þín frú forstjóri Tryggingastofnunar Ríkisins en mér er eiginlega nóg boðið í þetta skiptið og ætlast til þess að þurfa ekki að lenda í slíkum viðskiptum, rugl viðskiptum, oftar.

Ég óska þér frú forstjóri, og starfsfólki öllu góðs gengis og vona að þið getið aðstoðað þá sem til stofnunarinnar leita án þess að þeir þurfi að vera sérfræðingar á tölvusviði.

Virðingarfyllst

Hulda Björnsdóttir,

búsett í Portúgal undanfarin 9 ár og hef greitt skatta í Portúgal eins og lög gera ráð fyrir samkvæmt tvísköttunarsamningi landanna.

Kt. 220545-7419

5.ágúst 2019

23.ágúst 2019

Góðan daginn

Hér koma nokkra bollaleggingar um örorku og greiðslur til þeirra sem hafa þær. Ég tek fram að mér finnst þetta kerfi ótrúlega flókið og hér á eftir kemur kannski ástæða þess fram!

Allar tölur eru per mánuð, viðkomandi býr einn, er barnlaus og hefur hvorki atvinnutekjur eða tekjur frá lífeyrissjói.

Ég gaf mér að í fyrsta dæminu væri einstaklingurinn 50 ára þegar hann færi á örorku og að hann væri með 100 prósent búsetuhlutfall.

Síðan skoðaði ég mismuninn ef viðkomandi væri 35 ára þegar hann færi á örorku og í þriðja lagi skoðaði ég 25 ára einstakling.

Það sem vekur athygli mína er margt í þessu dæmi, sem er í raun ekki flókið og væri hægt að gera samskonar úttekt ef viðkomandi er með börn á framfæri, ef viðkomandi býr ekki einn, hefur tekjur frá lífeyrissjóði og ef svo vildi til að viðkomandi væri með einhverjar atvinnutekjur. Ég held mig hins vegar við einfalt dæmi eins og að ofan segir.

Jæja,

Örorkulífeyrir er í öllum dæmunum 46.481 krónur á mánuði

Aldurstengd örorkuuppbót kemur næst.

50 ára fær 4.649 krónur, 35 ára fær 20.917 krónur og sá 25 ára fær 44.157 krónur

Tekjutrygging er næst og fá allir 3 aldurshópar krónur 148.848 á mánuði samkvæmt þessu

Þá kemur heimilisuppbót sem er hjá öllum 3 hópum 50.312 krónur á mánuði

Loks er svo framfærsluuppbót sem er hjá 50 ára krónur 60.510,

hjá 35 ára krónur 44.242

og hjá 25 ára krónur 21.002 á mánuði

Og rúsínan í pylsuendanum er þessi:

ALLIR þrír hóparnir FÁ GREITT KRÓNUR 252.437 Á MÁNUÐI

Allir hóparnir 3 fá samtals fyrir skatt 310.800 krónur á mánuði

Allir hóparnir 3 greiða í skatt samtals 58.363

Allir hóparnir 3 fá greitt sömu upphæð á mánuði, krónur 252.437 eftir skatt.

Nú væri gaman að fá rökin fyrir því að kerfið er flækt svona fram og til baka. Af hverju er ekki bara ein tala í hverjum flokki fyrir alla öryrkja? Af hverju breytist talan í sumum flokkum eftir aldri en niðurstaðan verður sú sama?

Fyrir hverja er kerfið flækt svona?

Það hlýtur að vera ástæða fyrir þessum flækjum og mér þætti vænt um að fá þær upp á borðið á mannamáli.

Kannski væri þá hægt að senda þær upplýsingar til þingmanna sem vita flestir harla lítið um kjör öryrkja eða hvernig þeim er skammtað lífsviðurværi langt undir framfærsluviðmiðum og líklega treystir þingheimur á guð og lukkuna fyrir hönd öryrkja, eða kannski er þeim bara hjartanlega sama um þennann hóp þjóðfélagsins, svo framarlega að vinirnir sem nú prýða síður blaðanna vegna hárra tekna, sem þeir eiga jú allir skilið að fá vegna mikilvægra starfa, halda sínu!

Hvernig getur þingheimur lagst á koddann á kvöldin og sofið? Það eru jú þingmenn sem setja lög og reglur í landinu og ábyrgðin hlýtur að vera þeirra.

Hafa þingmenn uppskrift af því hvernig öryrkjarnir eiga að lifa af því sem þeim er skammtað?

Hulda Björnsdóttir

16. ágúst 2019

Boa tarde, segjum við hér í Portúgal þegar komið er fram yfir hádegi og við höfum fengið okkur hádegisverð.

Ég hef undanfarið verið að grúska í kjörum örykja og verð ruglaðri með hverjum deginum. Það er alveg ótrúlegt hvað hægt er að gera kerfi flókið og hvernig það er enn flækt með nýju skerðingar reglunni þar sem 35 aurarnir voru gefnir eftir og nú er bara 65% skerðing í staðinn fyrir 100% áður.

Maður gæti haldið að allt sem öryrkjar fá greitt væri nú undir 65% reglunni. Það væri svo einfalt og allir gætu skilið það.

Nei, endilega að flækja flókið mál enn meira er mottó þessarar viðbjóðslegu ríkisstjórnar, sem er held ég verri en allar hingað til í viðbjóðslegum grimmdar tökum á þeim sem eru öryrkjar, eldri borgarar eða fátækt fólk á Íslandi.

Ég rakst á grein í “Lifðu núna”, sem er snepill sem ég er ekki hrifin af enda skrifaður fyrir eldri borgara sem hafa það fínt og aldrei talað um eða við þá sem virkilega ættu að vera í svona snepli. Í þessum snepli sem ég sá var talað við frú formann eldri borgara í Hafnarfirði og dásamað líf hennar og mannsins þar. Gott ef þau voru ekki viðriðin fiskútflutning áður en þau urðu eldri borgarar!!!! Og það er nú ekki slæmt. Í sneplinum var talað um að frú formaður væri svo ægilega lukkuleg með að félög eldri borgara sæu um að fólk í þeim grúppum hefðu næga hreyfingu og companý. Það væri svo erfitt að verða einmana á efri árum!!!!!

Svo sagði frú formaður að félagið í Hafnarfirði ætlaði að styrkja lögsókn Gráa hersins varðandi skerðingar á lífeyrissjóðstekjum. Ekki talaði frúin um að hún sjálf ætlaði að styrkja málið. Og ofan á allt annað er frúin afgamall Sjalli eins og svo margir sem hafa hernumið félög eldri borgara vítt og breitt um landið.

Þegar ég sé svona greina í svona sneplum verð ég æf, svo vægt sé tekið til orða.

Öryrkjar eru ungir og miðaldra og allt þar á milli og hætta að verða öryrkjar þegar þeir verða 67 ára.

Öryrkjar eru í þeirri stöðu vegna slysa og vegna ýmissa annara ástæðna bæði andlegra og líkamlegra.

Á Íslandi er ríkisstjórn, og margar undanfarnar ríkisstjórnir, sem virðast hata allt sem heitir fátækt og heilsuleysi og erfiðleikar. Til þess að þurfa ekki að horfast í augu við raunverulegar staðreyndir loka ríkisstjórnir augunum fyrir þessum óskammfeilnu aðstæðum og gera allt sem hægt er til þess að losna við óþjóðalýðinn sem vogar sér að vera öryrki, fátæklingur eða eldri borgari. Aðferðin er einföld:

Svelta liðið.

Svelta heilbrigðirskerfið.

Svelta þjónustu við eldri borgara.

Svelta öryrkja og passa að þeir geti engan vegin séð glætu í framtíðinni aðra en að ljúka lífinu áður en framtíðin hefst.

Fátækt fólk, hvar í stétt sem það er, virkar eins og holdsveiku manneskja á ráðamenn. Passa upp á að þetta lið, fátæka fólkið, sé ekki að flækjast fyrir og skemma flottu myndina sem til dæmis frú forsætis talaði um í þætti á CNN af mikilli gleði og hló óspart. Nei, hún var ekki að óhreinka hendur sínar með því að minnast á að fólk deyr úr hungri og vosbúð á Íslandi í dag.

Ég held að forysta öryrkja sé að reyna að bæta hag þeirra en hún á við ramman reip að draga þar sem eru BB og frú forsætis ásamt sjálftökuliði úr öllum flokkum áratugum saman.

Þegar ég flutti til Kína var ég sett út úr þjóðskrá með heimili á Íslandi eftir 6 mánuði, nákvæmlega og ekki degi seinna þó ég væri ekki komin með varanlegt dvalarleyfi í Kína. Ég er auðvitað ekki ráðamaður eða ráðherra sem býr í Breiðholti og hefur gert áratugum saman en með skráð heimili úti á landi og fær þar af leiðandi greiddann dreifbýliskostnað! Ég er heldur ekki flottur formaður sem úthúðar konum og þeim sem hann lítur niður á í fylliríi á bar þegar hann átti að vera að vinna vinnuna sína og ég er ekki þessi ágæti formaður sem býr í villu en var skráður á eyðibýli og þáði laun fyrir vinnu sem hann vann ekki svo mánuðum skipti. Nei það er ekki sama hver er. Þeir sem komast á spenann á Alþingi þurfa ekki að skipta um húsnæði eða búsetustað þó þeir séu sannanlega ekki alveg að fara eftir reglunum.

Liðið sem þarf að búa í vernduðu hverfi af því að það er svo erfitt að fara í gönguferðir á ókunnum slóðum skammast sín ekki fyrir að hafa húsnæðið af einhverjum sem er fátækur öryrki í neyð og húsnæði gæti bjargað geðheilsu og jafnvel lífi hans. Nei, svoleiðis ráðamenn nýta sér hverja smugu og gefa svo þeim sem ætti að vera í fremstu röð áhersluatriðanna smá dúsur og ætast til að dúsuþegarnir komi þeim aftur á spenann í næstu kosningum.

Það er auðvelt að lofa upp í ermar og enn auðveldara að svíkja loforðin þegar speninn er kominn í höfn.

Þeir sem mjólka spena þjóðfélagsins eru ekki að hugsa um sveltandi öryrkja sem ekki eiga minnsta möguleika á að fá læknisþjónustu þegar líf þeirra liggur við. Nei, mjólkurkýrnar eru líklega að djamma á Spáni og víðar og hafa það gott í hitanum þar, syngjandi sælar og glaðar.

Kjör öryrkja eru kolsvartur blettur á þjóðfélagi sem getur séð fyrir bankastjórum sem eru látnir hætta og fá í verðlaun 40 ára lágmarkslaun verkamanns, bara fyrir það eitt að hætta sem bankastjórar.

Hvað ætli það þurfi margir öryrkjar að svifta sig lífi, eða deyja úr hungri og vosbúð áður en ráðamenn þjóðarinnar fara að sýna mannúð og hætta að líta á þetta fólk sem holdsveikt fólk sem ekki má koma nálægt?

Hvað ætli það þurfi margir eldri borgarar að deyja á elliheimilium og spítölum liggjandi í hlandi og saur síðustu klukkutíma ævinnar, áður en ráðamenn koma með úrlausnir í heilbrigðismálum?

Það er engin hætta á því að ráðamenn þjóðarinnar þurfi nokkurn tíman að liggja ósjálfbjarga úr hungri og vosbúð. Þeir hafa komið sér vel fyrir og passa upp á að ekki halli á þeirra framtíð.

Andskotinn hlýtur að hlakka til þess dags þegar sumir setjast að hjá honum og hann fær að sjá um að þeir njóti afraksturs mannúðar og gæsku á einu ríkasta landi heimsins þar sem þeir pössuðu upp á örfáa og sáu samviskusamlega um að hinir ætu það sem úti frýs.

Hulda Björnsdóttir

7.ágúst 2019

Góðan daginn

Eins og flestir vita þá hef ég ekki verið neinn sérstakur aðdáandi FEB í Reykjavík og nágrenni og hefur fundist að félagið væri frekar að vinna fyrir þá sem betur stæðu en okkur sem stöndum nokkuð höllum fæti eða erum hreinlega á hausnum.

Nú bregður svo við að verið er að afhenda hús sem mikill áróður hefur verið fyrir af hálfu þessa ágæta félags og man ég ekki betur en frú fyrrverandi formaður hafi í öllu sínu veldi staðið með skóflu í hönd (þetta getur þó verið misminni og óskhyggja) og mokað upp mold!

Samkvæmt upplýsingum sem ég fann núna á síðu FEB i Reykjavík og nágrenni stendur meðal annars þetta:

“Heildarkostnaður við að reisa fjölbýlishúsin tvö við Árskóga nemur röskum fjórum milljörðum króna. Kostnaðurinn verður 401 milljón hærri en gert var ráð fyrir þegar að kaupsamningar voru gerðir.”

Nú spyr ég:

Hvernig var staðið að gerð samninga?

Var ákvæði í samningum um að kostnaður gæti farið hundruði milljóna fram úr áætlun?

Var ákvæði í samningum um að aukin kostnaður félli á kaupendur?

Hverjir gerðu þessa samninga fyrir hönd FEB?

Hverjir fylgdu eftir framkvæmd bygginga fyrir hönd FEB?

Hverjir voru látnir vita að íbúðir kaupenda mundu hækka um margar milljónir vegna aukins kostnaðar við bygginguna?

Af hverju kom milljóna hækkun FEB svo gjörsamlega á óvart?, eða vissi stjórnin eða framkvæmdaaðilar um breytta stöðu og þögðu í þeirri von að fólk mundi bara samþykkja þegjandi og hljóðalaust margra milljóna hækkun?

Það er ekki verið að tala um einhverja þúsund kalla í hækkun. Það er verið að tala um milljónir á íbúð!¨

Fólk hefur selt fyrri eignir sínar til þess að geta keypt þessa og stendur þar af leiðandi á götunni og á að því er virðist við fyrstu sín engra kosta völ annarra en að samþykkja sukkið!

Það er eitthvað mjög bogið við þetta mál allt saman.

Ég er ekkert endilega að segja að vísvitandi hafi verið stefnt að því að blekkja fólk en ég er að segja að eitthvað er hér í þessu ferli sem stemmir ekki og finnst mér skýringar FEB sem ég fann á síðu félagsins óttalega aumingjalegar svo ekki sé sterkar að orði kveðið.

Ég ætla að leyfa mér að leggja til að nú verði FEB í Reykjavík og nágrenni tekið til rækilegrar endurskoðunar frá grunni og hlutlaus aðili taki að sér að skoða til hvers þetta félag er og hvort það sé í raun að vinna að hagsmunum félagsmanna, eldri borgara, og bættra kjara þeirra.

Það er ágætt að hafa klúbba sem sjá um að skemmta með dansiböllum og jólakortasölu ásamt utanlandsferðum og jafnvel klúbb sem gerir fallega þætti í sjónvarpi um hvað það sé dásamlegt að verða 67 ára á Íslandi og telja þar upp allt það dásamlega sem sé í boði og hvar sé hægt að kaupa flottustu jepplingana og drekka fínasta koníakið!

Það er stór hópur eldri borgara, fólks sem orðið er 67 ára eða eldra, sem hefur það virkilega skítt og ég sé ekki sjónvarpsþætti um það fólk á vegum FEB. Ég hef heldur ekki séð ráð um það á vegum FEB hvernig fara skuli að því að skrimmta út mánuðinn þegar eftirlaunin eru þrotin á 3ju viku mánaðar.

Ég gæti haldið áfram að telja upp fleira en læt þetta duga í bili.

Það er réttlætismál að fólk fái að vita hvernig stendur á sukkinu og kostnaðaraukanum. Það er ekki nóg að skrifa hugljúf bréf eins og það sem er á síðu FEB núna. Það kemur málinu ekkert við hvernig byggt var í fortíðinni fyrir eldri borgara, en auðvitað skil ég að stjórnin þurfi að reyna að róa óróleg gamalmennin sem hafa verið svikin svo hrikalega.

Hulda Björnsdóttir

25.júlí 2019

Boa tarde segjum við hér í Portúgal þegar komið er yfir hádegi.

Ég er ekki viss um hvað ég ætti að segja á íslensku svo portúgalskan verður að duga.

Hér logar allt og skógar brenna svo tugum hektara skiptir. Þetta er sumarglaðningur okkar hér í litla landinu mínu á hverju sumri.

Þegar ég lít út um gluggann hérna hjá mér núna þá er ég hérumbil viss um að dökku skýin eru ekki reykur, ég held að þau séu rigning og það er dásamlegt ef rétt reynist.

Evrópa er að deyja úr hita en hér í þorpinu mínu eru 23 gráður, sólarlaust og dásamlegt, í bili.

Facebook skammar mig fyrir að hafa ekki skrifað neitt í marga daga og ekki get ég látið bókina blessaða vera með áhyggjur af mér, nóg er nú samt.

Í morgun fór ég í viðbjóðslega rannsókn, það er jú verið að hamast við að finna út af hverju ég er eins og liðið lík, og þó ég eti járn eins og mér sé borgað fyrir það breytist ekkert og handleggirnir ískaldir!

Mér varð hugsað til þeirra sem eru komnir á efri ár og flytja til dæmis til Spánar og kunna ekki málið. Það getur verið snúið að fara til læknis eða á spítala og tala ekki mál landsmanna.

Clinikin sem ég var á í morgun (fyrirgefið slettuna) er frábær og ég hef farið þangað oft og fólkið í afgreiðslunni þekkir mig og rannsóknarliðið einnig. Það er góð tilfinning að þurfa ekki að útskýra endalaust hver ég er og hvaðan ég kem. Miklu betra er að geta bara sest inn og beðið eftir kallinu og vera svo borin í gegnum viðbjóðslegar rannsóknir sem væri auðvitað best að vera laus við. Staðreyndin er hins vegar sú að ENGINN á þessari klinikku talar annað en portúgölsku og mér verður alltaf hugsað til þeirra sem eru á mínum aldri á Spáni og kunna ekki spænskuna. Ég veit hreinlega ekki hvernig fólk fer að. Hugmyndaflug mitt nær ekki upp í að geta ekki talað við þann sem er að hjálpa manni við að finna út hvað er að kroppnum, að ég tali nú ekki um hvað það er gott að láta hlúa að sér þegar maður er skíthræddur eins og ég var í morgun, en þá verður maður að skilja málið.

Mér datt í hug að kannski væri gott fyrir þá sem hyggja á flutninga til Spánar að fara á námskeið fyrir brottför og læra eitthvað í málinu. Bara datt þetta svona í hug.

Erindi mitt í dag var samt ekki sjúkdómar og rannsóknir, heldur barátta félaga eldri borgara um land allt og spurningin fyrir hverja er verið að berjast.

Ég sá að verið var að kvarta yfir erfiðleikum við að komast í utanlandsferðir á vegum félags eldri borgara einhvers staðar úti á landi.

Þegar ég les svona þá hvarflar að mér hvað svona ferðir kosti og hvort þær séu niðurgreiddar og hvort þær séu fyrir ALLA eldri borgara. Það eru jú margir sem lepja dauðann úr skel og eiga varla fyrir mat í sumarfríi hvað þá fyrir utanlandsferð.

Ég hef stundum æst mig yfir afrekum Landssambands eldri borgara og skilningsleysi þeirra á kjörum þeirra sem verst hafa það og ég hef argast yfir því af hverju ekki er barist af hörku fyrir þá sem eru að fara yfirum af vosbúð og vanlíðan vegna peningaskorts þegar komið er yfir 67 ára aldurinn.

Hvenær ætli Landssambandið vakni?

Getur verið að það sé svona illa að sér vegna þess að litlu samböndin skilja ekki heldur, eða vilja ekki skilja, að metnaður ætti að vera fyrir því að allir sem komnir eru yfir 67 ára aldurinn hafi það sæmilegt og allavega að þessi hópur allur geti lifað mannsæmandi lífi og átt fyrir mat alla daga mánaðarins.

Svo ætla ég að klikkja út með gleðifréttinni sem ég sá nýlega.

Formaður Félags eldri borgara í Reykjavík og nágrenni er hættur að tala um hina minnstu bræður. Ég er semsagt hætt að vera hinn minnsti bróðir í augum formannsins! Þetta er fínt.

Samt

Ég er svo óstjórnlega vanþakklát og varð æf þegar ég sá í grein eftir hans hátign að nú er hann farinn að tala um mig sem gamla fólkið!!!!!!!!!

Ég hef ekkert á móti gömlu fólki en eitthvað skekkir það reikningskunnáttu mína þegar fólk 67 ára og aðeins eldra er komið í tölu gamla fólksins, sem mér finnst eiginlega vera fólk eins og mamma var þegar hún var orðin tæplega 90 ára.

Herra formaður Ellert B. Viltu vera svo vænn að leyfa mér að vera áfram utan við hópinn sem þú telur þig tilheyra, það er gamla fólksins sem komið er á grafarbakkann.

Ég veit svei mér ekki hvort mér finnst verra að vera stimpluð sem “gamla fólkið” eða að vera stimpluð sem “hinir minnstu bræður”.

Líklega er ég bara hrokafull og vanþakklát en gömul er ég ekki. Ég neita því algjörlega. Ég á nokkur ár í pokahorninu eins og við segjum hér í litla landinu mínu og meiri lífsreynslu á ég en þeir sem eru fimmtugir. Lífsreynsla mín núna á þessu aldurskeiði er öðruvísi og þroskaðri en þegar ég var yngri en ég held áfram að þroskast alla vega í nokkur ár enn, haldi ég heilsu.

Ellert getur, fyrir mér, sest í helgan stein með gömlu fólki, en með mér getur hann ekki fengið far, því miður!

Hulda Björnsdóttir

16. júlí 2019

Góðan daginn

Ég má til með að minnast á væntanlega lögsókn vegna þess hvernig ríkið fer með peningana okkar sem fáum greitt úr lífeyrissjóðum. Peninga sem við höfum safnað alla okkar starfsæfi til þess að eiga áhyggjulaust ævikvöld!

Ævikvöldið er hreint ekki áhyggjulaust hjá líklega 30 prósentum fólks sem komið er á eftirlaun.

Eftir þrældóm og uppbyggingu þjóðfélags sem hinir yngri njóta nú góðs af er þessi hópur skilinn eftir og gleymist þar til rétt fyrir kosningar og flokkar koma hver á fætur öðrum með gylliboð í stað atkvæðis!

Það er alveg sama hvaða flokkur er, þetta er gangurinn fyrir kosningar og kjósendur gleyma sviknu loforðunum fyrir síðustu kosningar og halda að nú verði allt gott!

Ég hef fylgst með gengi krónunnar núna undanfarið og er ekki par hamingjusöm. Þeir sem hafa flúið land eru ekki öfundsverðir af stöðunni. Áætlanir renna út í sandinn. Ekkert óvænt má koma upp á þegar krónan fellur eins og hún hefur gert núna þessa síðustu mánuðina.

Á svona tímum er gott að hafa eitthvað til þess að binda vonir við og mínar vonir, fyrir hönd fólks sem hefur sparað í Lífeyrissjóði, eru bundnar við lögsókn Wilhelms og félaga.

Það hefur verið talað um þennan málarekstur, eða að það þyrfti að hefja málið, í mörg ár. Nú loksins eru komnir ötulir baráttumenn sem ætla að gera alvöru úr þessu og undirbúningur er á fullu.

Það eru ekki stjórnmálaflokkar sem standa að þessu máli. Nei, hér eru á ferðinni einstaklingar sem hafa með miklum baráttuvilja og þreki náð markmiði sínu og sjá nú brátt fyrir endann á undibúningi. Hér eru ekki menn og konur sem berja sér á brjóst og þenja sig yfir eigin ágæti. Nei, þetta ágæta fólk heldur sínu striki, labbar áfram og gefst ekki upp. Margir hafa lofað að styðja við málið, bæði fjárhagslega og á annan hátt. VR hrinti stuðningnum af stað og ég man í bili eftir Rafiðnaðarsambandinu og einhverjum fleiri.

Það sést ekki mikið skrifað um þetta mál og þess vegna ákvað ég að gera það að mínum pistli þennan daginn.

Eins og ég hef sagt áður, verð ég liklega ekki ofanjarðar þegar þessu líkur en á meðan ég tóri mun ég styðja Wilhelm og félaga heilshugar. Mér finnst þetta besta mál sem upp hefur komið í langan tíma og er þakklát fyrir. Ég hvet fólk til þess að flykkja sér um málið þegar það er farið af stað og láta stuðninginn ekki vanta. Ég hvet fólk einnig til þess að hafa í huga að ekki skitpir máli hvar í flokki hver og einn stendur. Þetta mál kemur flokkspólitík ekkert við, nákvæmlega ekkert.

Hulda Björnsdóttir

14.júlí 2019

Góðan daginn

Hérðasdómur hafnaði beiðni TR um áfrýjun vegna mistakanna í prentun laga um Almannatryggingar.

Eins og ég hef sagt áður kom þessi niðurstaða Héraðsdóms mér á óvart en þóttu mér þetta líka góð tíðindi. Það er alltaf gott þegar mál dragast ekki árum saman.

Það er eitt og annað sem hefur flogið í gegnum hugann varðandi þetta mál allt saman.

Lögin áttu að taka gildi 1.janúar 2017. Tryggingastofnun átti að borga út samkvæmt þeim í janúar 2017 og þar á bæ er greitt fyrirfram en ekki eftirá. Umræða hafði farið fram um málið, reyndar lög sem höfðu verið í endurskoðun í 10 ár, hvorki meira né minna, og í umræðum kom skýrt fram að skerða skyldi ellilífeyri eftir að 25 þúsund krónu tekjumarki væri náð! Þetta vissu allir sem vita vildu á Alþingi en svo má velta því fyrir sér hve vel þingmenn kynna sér mál sem verið er að fjalla um!

Ég hef fylgst með stjórnmálum í rúm 50 ár og man ekki betur en venjan hafi verið sú á hinu háæruverða að keyra mál í gegn á síðustu dögum, bæði fyrir jólafrí og sumarfrí, líklega til þess að ekki gæfist of mikill tími til þess að finna að og reyna að breyta. Ég er nokkuð örugg um að einhverntíma hafi mál farið í gegn með prentvillum sem hafi svo verið leiðréttar hægt og hljótt eins og meiningin var með lögin um Almannatryggingar sem tóku gildi árið 2017 í janúar.

Mér finnst ekkert óeðlilegt við að TR hafi farið eftir frumgagninu því þar þurfti að undirbúa greiðslur, fyrirfram greiðslur, fyrir janúar 2017 og slíkt gerist ekki á einum degi. Þegar villan kemur svo í ljós verður allt vitlaust og nýr flokkur slær sér upp á geyminu og fer í mál og eins og nú er komið í ljós vinnur málið sem er í raun hið besta mál. Nú er uppskerutími til þess að slá sér upp á svona sigri því kosningar koma brátt, gæti ég trúað.

Semsagt, nú á að endurgreiða þeim sem voru hlunnfarnir í janúar og febrúar árið 2017 og þar vakna nokkrar spurningar sem hefur í raun verið svarað en mér finnst vel þess virði að hnykkja á.

Þeir sem hafa fengið minna en 25 þúsund úr lífeyrissjóði þessa 2 mánuði árið 2017 fá enga endurgreiðslu, þeir hafa ekki sætt neinum skerðingum.

Þeir sem hafa fengið meira en 25 þúsund úr lífeyrissjóði þessa 2 mánuði árið 2017 fá skerðinguna bætta, sumir frá nokkrar krónur og aðrir meira og jafnvel eru einhverjir sem að öllum líkindum fá fullan ellilífeyri sem var á þessum tíma krónur 228.734 á mánuði.

Þeir sem fengu minnst úr lífeyrissjóðum fá minnst. Þeir sem fengu meira úr lífeyrissjóðum fá meira. Þetta er bara rökrétt. Þeir sem hafa fengið meira greitt úr lífeyrissjóðum hafa notið þess heiðurs að hljóta meiri skerðingar í krónum talið.

Þá eru það þeir sem mér finnst allra merkilegast að skoða. Árið 2017 máttir þú hafa 533.297 þúsund krónur í tekjur ef þú ætlaðir að fá ellilífeyri frá TR. Ef þú hafðir 533.298 þúsnd krónur í tekjur á mánuði var beiðni þinni um ellilífeyri frá TR hafnað

Samkvæmt því sem forstjóri TR segir í viðtali við Morgunbalðið gætu, og munu líklega, þeir sem voru yfir hámarki tekna en höfðu sótt um lífeyrir og umsókninni hafnað á grundvelli of hárra mánaðartekna, fá greiddan fullan lífeyri þessa mánuði eða krónur 228.734 fyrir hvorn mánuð.

Þetta er staðreynd sem forystu flokks þess sem höfðaði málið var ljóst frá upphafi!

Þetta er staðreynd sem ég hef ekki séð fjallað um þegar flokkurinn brosir út í bæði og hrósar sigri!

Auðvitað er þetta alveg rökrétt niðurstaða, þ.e. að þeir sem hafa tapað mestu fái meira en hinir. Þannig er það bara.

Hins vegar fyllist ég “réttlátri reiði” þegar ég sé flokksforystu hampa sér á gullstól og láta alveg vera að kljúfa málið til mergjar og segja frá því hvernig málið er vaxið frá a til ö!

Hvað er svo hægt að læra af þessum klaufamistökum við innslátt á lögunum sem voru samþykkt á hinu háæruverðuga og áttu að taka gildi og tóku gildi þann 1.janúar 2017?

Jú, þeir þingmenn sem hafa gagnrýnt vinnubrögð hins háæruverðuga, réttilega, ættu nú að taka fram betri buxurnar og beita sér fyrir því að þingmálum sé ekki demt inn á síðustu dögum og klukkutímum fyrir frí. Þetta er nefninlega, og hefur verið, háttur allra flokka allan þann tíma sem ég hef fylgst með stjórnmálum!

Nýstirnin eru auðvitað undanskilin, því þau hafa ekki verið nægilega lengi á hinu háæruverðuga og hafa ekki setið í ríkisstjórnum!

Hulda Björnsdóttir

2.júlí 2019

Góðan daginn

Ég veit ekki hvort ég er reið, sár, öskrandi ill eða bara undrandi.

Hafið þið hugsað um hvernig jafnræðisregla er?

Er hún ekki til þess að fólki sé ekki mismunað?

Þessi ágæta regla er eitthvað í þessa áttina:

“Allir skulu vera jafnir fyrir lögum og njóta mannréttinda án tillits til kynferðis, trúarbragða, skoðana, þjóðernisuppruna, kynþáttar, litarháttar, efnahags, ætternis og stöðu að öðru leyti.

Konur og karlar skulu njóta jafns réttar í hvívetna.”

Af hverju er ég svo að æsa mig yfir þessu?

Jú, ég er fjúkandi yfir því hvers vegna, þegar ég er orðin 67 ára, allir 100 þúsund kallar sem ég afla mér eru ekki meðhöndlaðir eins hjá TR. Af hverju eru sumir 100 þúsund kallar meira virði en aðrir? Af hverju?

Forkólfur Félags eldri borgara í Reykjavík sem nú er orðinn forkólfur Landssambands eldri borgara ásamt nokkrum stjórnmálamönnum, til dæmis formanni Flokks fólksins, hafa barist grimmt fyrir því að allir hundraðþúsund kallar séu ekki jafnir fyrir lögunum ef móttakandi er orðinn 67 ára eða eldri.

Hér koma dæmi um hvernig þeir sem segjast berjast fyrir þá sem lægri hafa tekjurnar hafa komið baráttunni fyrir, og eru harla stoltir af.

Dæmi 1:

Einstaklingur sem hefur eingöngu tekjur frá TR fær á mánuði krónur 212.902 eftir skatt.

Ellilífeyrir krónur 248.106 mínus skattur krónur 35.203 og það gerir 212.902 per mánuð. Svo fær þessi einstaklingur í orofs- og desemberuppbætur samtals 93.555 krónur fyrir skatt.

Dæmi 2:

Hér er einstaklingur sem fær 100 þúsund krónur á mánuði úr lífeyrissjóði af því að hann hefur sparað lögum samkvæmt til efri áranna lögbundna prósentu af launum sínum.

Þessi einstaklingur fær frá TR krónur 214.355 fyrir skatt, (frítekjumark er 25 þúsund hér)

Svo fær hann 100 þúsund krónur frá lífeyrissjóði fyrir skatt

Frádreginn skattur samtals er 59.676 og tekjur eftir skatt krónur 254.679

Þessi einstkalingur fær 75.555 krónur í orlofs- og desemberuppbætur á ári, fyrir skatt.

Dæmi 3:

Hér kemur einstaklingur sem hefur 100 þúsund króna atvinnutekjur á mánuði, hann er orðin 67 ára þessi og nú eru 100 þúsundkallarnir allt í einu orðnir meira virði en hjá þeim sem sparaði alla starfsævi sína í Lífeyrissjóð samkvæmt lögum. Þessi staða er vegna hörku baráttu formanns LEB og fleiri sem eru sannfærðir um að best sé að troða fólki yfir 67 ára út á vinnumarkaðinn, hvað sem tautar og raular. Þetta baráttulið ber enga virðingu, virðist vera, fyrir þeim sem eru orðnir útslitnir af erfiðsvinnu alla sína ævi og vilja fá að njóta ávaxta sparnaðar, lögbundins sparnaðar, síðustu ár ævinna, rétt eins og þeim var lofað við stofnun Lífeyrissjóða!

Þessi einstaklingur fær 248.105 krónur á mánuði frá TR fyrir skatt (frítekjumark hér er 100 þúsund, engar skerðingar af þessum 100 þúsund kalli)

Svo fær hann 100 þúsund krónur í atvinnutekjur á mánuði, fyrir skatt

Eftir skatt eru tekjur þessa einstaklings krónur 275.962 á mánuði

Í orlofs- og desemberuppbætur fær þessi einstaklingur krónur 93.555 á ári, fyrir skatt (engar skerðingar hér)

Dæmi 4:

Hér er loks einstaklingur sem hefur haft efni á að leggja fyrir á séreignasjóð til efri áranna. Þetta er að öllum líkindum ekki verkakonan eða verkamaðurinn. Þetta er frjáls sparnaður og getur hver og einn valið að taka þátt eða ekki.

Þessi einstaklingur fer nú að taka út úr séreignasjóðinum sínum og tekur 100 þúsund krónur á mánuði, rétt eins og sá sem hefur sparað samkvæmt lögbundnum sparnaði ákveðna prósentu af launum sínum en hafði ekki val!

Þessi einstaklingur fær 248.105 þúsund krónur á mánuði frá TR fyrir skatt ( engar skerðingar hérna)

Hann fær 100 þúsund krónur úr séreignasjóði fyrir skatt

Eftir skatt hefur þessi einstaklingur 275,962 þúsund krónur á mánuði eftir skatt, nákvæmlega sömu upphæð og sá sem fær 100 þúsund kallinn fyrir atvinnu, en 21.283 þúsund krónum meira en sá sem fær út úr venjulegum lífeyrissjóði.

Í orlofs- og desemberuppbætur fær þessi einstaklingur 93.555 krónur á ári fyrir skatt ( og enn og aftur engar skerðingar).

Hundraðþúsund kallinn er líklega ekki stór upphæð í augum sumra og tekur því ekki að vera að rífa sig út af smámunum, það finnst líklega formanni LEB og fleirum.

Ég verð þó að segja að mig svíður sárt að minn hundraðþúsund kall skuli vera minna virði en þeirra sem annað hvort eru úti á vinnumarkaði eða eru að taka út séreignasparnað.

Mér finnst einfaldlega að allir hundraðþúsund kallar fólks sem er orðið 67 ára eða eldra, og er farið að taka eftirlaun frá TR, eigi að haf jafnt vægi.

Ég er svo einföld að ég held að mjólkin og maturinn kosti jafn mikið fyrir þann sem er orðin 67 ára hvort sem hann hefur hundraðþúsund kallinn sinn frá atvinnutekjum eða sparnaði í lögbundinn lífeyrissjóð.

Ég er öskuill yfir því að við sitjum ekki við sama borð. Ég verð fjúkandi þegar stjórnmálamenn hæla sér af dúsum á sama tíma og þeir berjast með kjafti og klóm fyrir þá sem eiga val. Það er einfaldlega þannig að ekki geta allir unnið úti eftir 67 ára aldurinn. Margir eiga ekkert val en það er ekki nógu fínt fyrir formann LEB og fleiri að berjast fyrir sama verðmæti ALLRA hundrað þúsund kalla þeirra sem eru 67 ára eða eldri.

Mikil er skömm ykkar sem teljið fólki trú um að hagur ALLRA eldri borgara brenni eins og logandi eldar í brjósti ykkar. Ég skil ekki hvernig þið getið farið að sofa á kvöldin, ég bara skil það ekki.

Hulda Björnsdóttir